MARC21 номын санчийн гарын авлага 1 номын нээлтийн үйл ажиллагаа өнөөдөр МУБИС-ийн төв номын сангийн хурлын танхимд боллоо. Үйл ажиллагааг нээж МУБИС-ийн ректор, профессор Ж.Батбаатар үг хэлсэн бөгөөд бусад их дээд сургуулийн номын сангийн эрхлэгч, номын санчид болон бусад эрхэм хүндтэй зочид төлөөлөгчид оролцлоо.
МУБИС-ийн номын сан нь 2018 оноос олон улсын KOHA системийг нэвтрүүлэн, “MARC21” форматын дагуу ном хэвлэлийн каталогжуулалтыг олон улсын стандартын дагуу оруулж эхэлсэн. KOHA программ нэвтэрч хэрэглэж эхэлснээс хойш туршлага солилцох уулзалт ярилцлага хийж, стандарт форматыг орчуулах оролдлого гарган, нэгдсэн каталогийн талбартай болох, мөн нэг хийсэн каталогийг харилцан хуваалцах техник технологийн боломжийн талаар эрэлхийлсээр байна. Анхны сургалт Каталогжуулалт нийтийн үйлчилгээ сэдвээр, 2 дахь сургалт Сэдвийн түлхүүр үг, нэрийн баталгаажуулсан бүртгэл, 3 дахь удаагийн сургалт Стандарт бус номын каталог сэдвийн хүрээнд зохион байгуулагдсан бол энэ удаа номын санчийн гарын авлага хэвлүүлэн уулзаж байна.
Америкийн Монгол Судлалын Төвөөс санаачлан эхний удаад МУҮНС-тай, хожим нь МУБИС-тай хамтран 2020-2023 онд хийсэн MARC формат, RDA стандартаар дагнасан дээрх сургалтууд нь энэхүү гарын авлагын үндэс болсон. Өнгөрсөн 3 жилийн 3 удаагийн сургалтаар олон улсын номын сангийн программ хэрэглэж байгаа каталогч нар үндсэн суурь ойлголтоо авч, Монголын номын сангийн каталогжуулалт олон улсын стандартад дахин нэгдэх алхам ойртсоор байна.
Номын зохиогч МУБИС-ийн төгсөгч, Конгрессын номын сангийн Монгол номын мэргэжилтэн, каталогч, доктор М.Саруул-Эрдэнэ, МУБИС-ийн номын сангийн каталогч, эрдэм шинжилгээний судлаач номын санч Д.Цолмон нар ажилласан бөгөөд редактораар МУБИС-ийн номын сангийн эрхлэгч Ж.Баатарсүрэн ажилласан юм. Гарын авлагыг МУБИС-иас дэмжиж хэвлэлтийг санхүүжүүлэн олны хүртээл болгож байна.
Цаашид заавал сурах, үйлдэх ёстой Нэрийн баталгаажуулсан бүртгэл, Тогтмол хэвлэлийн каталог, Сэдвийн түлхүүр үг, орчуулах нэг мөр болгох нэр томьёо гэх мэт олон зүйл үлдсэн тул сургалт ч үргэлжлэх ёстой, гарын авлага ч үргэлжлэн гарсаар байх учиртай юм. Мөн энэхүү анхны гарын авлагыг хэрэглэх явцад мэргэжилтнүүдээс ирэх санал, номын санчдын хүсэлт зэргийг тусган, нэмж засварласан хэвлэлүүд ч гарах нь зүй ёсны хэрэг. Ингэснээр цаашид Монголын номын сангийн салбар олон улсын MARC форматын гарын авлагуудтай болж, олон улсын номын сангийн каталогжуулалтын сүлжээнд сан хөмрөгийн каталогоо нийлүүлэх, хөл нийлүүлэн алхах үүд хаалга нээгдэх болно.
