Өнөөдөр МУБИС-д олон улсын их, дээд сургуулиудын ахмад багш нарын уулзалт, зөвлөгөөн зохион байгуулагдлаа. Энэхүү арга хэмжээнд ОХУ, БНХАУ, Словак улс, Тайланд улсаас нийт 45 гадаад багш хүрэлцэн ирж, Монгол улсаас 15 ахмад багш оролцож байна.
Тус зөвлөгөөн нь олон улсын ахмад багш, судлаач, эрдэмтдийн хамтын ажиллагааг өргөжүүлэх, туршлага солилцох, боловсрол, шинжлэх ухааны салбар дахь хамтын хөгжлийг дэмжих зорилгоор зохион байгуулагдаж, МУБИС-ийн Ахмадын хорооны тэргүүн, профессор С.Жамц арга хэмжээг удирдан ажиллав.
Олон улсын ахмад багш нарын зөвлөгөөнийг албан ёсоор нээж МУБИС-ийн ректор, профессор Ж.Батбаатар мэндчилгээ дэвшүүлэн үг хэллээ. Мөн Словак улсын Эдийн засаг, Бизнесийн Их сургуулийн ректор, профессор Фердонанд Дано Братислав, AIUTA-гийн үүсгэн байгуулагч, ерөнхийлөгч Француа Виллас, Олон улсын их сургуулиудын ахмад багш нарын холбооны дэд ерөнхийлөгч, профессор Жанка Себера Чладеска нар оролцогчдод мэндчилгээ дэвшүүлэв.
МУБИС-ийн Ахмадын хороо, БНФУ-ын Олон Улсын их сургуулиудын Ахмад багш нарын холбоо (ОУИСАБХ) хамтран туршлага дэлгэрүүлэх сургалт, судалгаа, эрдэм шинжилгээний хамтын ажиллагааг явуулах зорилгоор 5 жилийн хугацаатай хамтран ажиллах санамж бичиг байгуулав.
Санамж бичгийн хүрээнд:
- Эрдэм шинжилгээний хурал, холбогдох арга хэмжээг зохион байгуулах, оролцох;
- Олон улсын төсөл, хөтөлбөрт хамтран ажиллах;
- Хэвлэл, хэвлэмэл материал, тайлан болон бусад эрдэм шинжилгээний мэдээлэл солилцох;
- Харилцан тохиролцсон бусад үйл ажиллагааг хамтран хэрэгжүүлнэ хэмээн тусгажээ
Олон улсын их, дээд сургуулиудын ахмад багш нарын уулзалт, зөвлөгөөний нээлтийн үйл ажиллагаа МУБИС-ийн хичээлийн I байрны 300 тоот хурлын танхимд 10 цагт эхэлсэн бөгөөд 14 цагаас хамтын ажиллагааны санамж бичиг байгуулах арга хэмжээ болон олон улсын зөвлөгөөний салбар хуралдаан болов.