МУБИС АНУ-ын Канзас хотын Миссуригийн их сургуультай хамтран ажиллаж, төсөл хөтөлбөр хэрэгжүүлж ирсэн. Өнөөдөр тус сургуулийн Ази судлалын төвийн захирал Сан Ким, хөтөлбөрийн зохицуулагч Д.Саямаа нарыг МУБИС-ийн проректор, доктор Д.Соронзон, ЗХНГ-ын захирал, дэд профессор Л.Мөнхтуяа, Гадаад харилцааны албаны дарга, дэд профессор Г.Цогзолмаа нар хүлээн авч албан уулзалт хийлээ.
Хоёр сургуулийн хамтын ажиллагааны хүрээнд 2022 онд МУБИС-ийн 12 багшийн бүрэлдэхүүнтэй баг Миссуригийн их сургуулийн “Багш хөгжлийн хөтөлбөр”-т суралцсан юм. Энэ удаагийн уулзалтын үеэр захирал Санг Ким тус сургуулийн Багш хөгжлийн хөтөлбөрт хамрагдаж байсан бүх багуудаас хамгийн шилдэг нь МУБИС-ийн багш нарын баг байсан тухай онцлон тэмдэглэж, дахин хамтран ажиллахад таатай байгаагаа илэрхийлсэн юм.
Албан уулзалтаар багш солилцоо, хамтарсан судалгааны боломж, хэрэгжүүлж болох төсөл хөтөлбөрүүдийн тухай санал солилцсон бөгөөд энэ удаагийн уулзалт хоёр сургуулийн хамтын ажиллагааг бэхжүүлэх чухал алхам боллоо хэмээн талууд дүгнэсэн юм.
