Энэ удаа оюутан ахуй цагтаа 2023, 2024 оны “Хүндийн өргөлтийн мастер залуучуудын дэлхийн аварга шалгаруулах нээлттэй тэмцээн”-ээс мөнгөн медалийн эзэн болсон оюутан Одсүрэнгийн Төрболд-ыг онцолж байна.
Тэрээр МУБИС-ийн Биеийн тамирын сургуулийн Багш, биеийн тамирын боловсрол хөтөлбөрийн 4-р курст суралцдаг бөгөөд 2023-2024 оны хичээлийн шинэ жилийн нээлтийн арга хэмжээнд жилд нэг удаа олгодог “МУБИС-ийн ректорын нэрэмжит тэтгэлэг”-ээр шагнагдсан манай бахархалт оюутнуудын төлөөлөл юм.
Малчин аавын хүү тэрбээр спортын тал бүрийн авьяастай болох нь хууч ярилцлагын үед анзаарагдсан төдийгүй аргагүй л хүч чадал, авьяастай нь өнгөрсөн богино хугацаанд үзүүлсэн спортын амжилтуудаас тодорхой харагдаж байв. Тухайлбал, Хүндийн өргөлтын спортоор (пауэрлифтинг): 2023 онд залуучуудын Дэлхийн АШТ-ний Мөнгөн медаль, Залуучуудын Улсын АШТ-ээс Алт, Мөнгөн медаль, 2024 оны Залуучуудын Улсын АШТ-ээс Алт, Хүрэл медаль хүртэхийн зэрэгцээ мөн 2024 оны “Хүндийн өргөлтийн мастер залуучуудын дэлхийн аварга шалгаруулах нээлттэй тэмцээн”-ээс Мөнгөн медалийн болзол хангаж Дэлхийн аваргын хошой Мөнгөн медалийн эзэн болсон бахархалт түүхээ бүтээгээд байгаа билээ.
Тус спортын төрөлд өсвөр үеийн УАШТ-ний 4 мөнгөн медальтай бол төрөлх Өвөрхангай аймгийнхаа 5 удаагийн дархан аварга авьяаслаг тамирчин хүү юм. О.Төрболдын унасан газар угаасан ус нь Өвөрхангай аймгийн гэрийн модоороо алдаршсан Уянга сум бөгөөд бага ангидаа /3-р анги/ Үндэсний бөхөөр спортын гараагаа эхлүүлсэн түүний анхны шагнал нь сургуулийнхаа АШТ-ний Мөнгөн медаль байв. Улмаар 9-р ангидаа зэргэлдээх Тараг сумын баяр наадмын бөхийн барилдаанд үзүүрлэсэн нь сурагч насных нь сайхан дурсамжуудын нэг болсон нь дамжиггүй ээ.
Түүнээс хойш Жудо, Чөлөөт, Самбо бөхийн төрлөөр 10 настайгаасаа Батжаргал багшийнхаа удирдлага дор хичээллэж эхэлсэн нь бөхийн алдар цуутан олонтой Өвөрхангайчуудынхаа бөхийн уламжлалыг нь үргэлжлүүлэх авьяас төгөлдөр хүү шиг бодогдов. Оюутан болоод Биеийн тамирын сургуулийн багш ОУХМ, доктор О.Болд-Эрдэнийн үүсгэж хөгжүүлсэн Жюү жицү бөхийн спортын төрөлд 2023 оны Оюутны АШТ-ээс Хүрэл медаль авсан бол Жудо-гийн Оюутны АШТ-ээс мөн л Хүрэл медаль авч чаджээ.
Түүнчлэн МУБИС-ийн Оюутны хананд авиралтын АШТ-ээс Мөнгөн медаль аваад байгаа аж. Оюутан О.Төрболдын спортынхоо төлөө зориулсан хөлс хүч, авьяас билиг, гавьяа зүтгэлийг нь зохих ёсоор үнэлэн урамшуулсан нь сайшаалтай. Үүнд: Өвөрхангай нутаг нь 2023 оны "Алтан сарнай" наадмын оны шилдэг залуугаар тодруулсан бол Монголын Үндэсний Олимпын хорооноос Алтан медалиараа тус тус шагнан урамшуулжээ. Тэрээр хүндийн өргөлтийн спортод анх хөтлөн оруулж заан зөвлөж байдаг аймгийнхаа Спорт хорооны нарийн бичгийн дарга Мөнхсүлд багш болон МУБИС-ийн ахмад профессор, МУГБ Ж.Баасандамба, доктор Ш.Энхбүрэн, Чойжилжав багш нартаа, бусад дэмжиж тусалдаг эрдэмтэн багш нартаа талархаж явдагаа хэлсэн юм.
Энэ үеэр түүний төрсөн сайхан нутгийнх нь талаар товчхон сонирхов. Өвөрхангайн Уянга сум нь Халхын алдарт сайн ноён Намнансүрэнгийн төрсөн нутаг ба байгалийн үзэсгэлэн бүрдсэн найман нуураараа алдаршсан болохыг манайхан андахгүй бизээ. Энэ удаа Найман нуурын найман нэрийг мэдсэн нь сонирхолтой сайхан байсан юм. Ингээд нэрлэвэл:
-Ширээт нуур
-Халиут нуур
-Бугат нуур
-Хаяа нуур
-Хүйс нуур
-Мухар нуур
-Дөрөө нуур
-Баян уул гэсэн 8 цэнгэг уст, байгалийн үзэсгэлэнт монгол орны бахархалт нуурууд Уянга сумын нутагт оршдог байна. Байгалийн үзэсгэлэнт сайхан нутгаасаа бяр чадал, эрдэм оюуныг шингээн төрсөн тамирчин оюутан О.Төрболд маань Жудо бөхийн спортыг битүүхэндээ сонирхон буйг анзаарсан ба одоохондоо хичээллэх клүб, дасгалжуулагч багшаа сонгоогүй л юм байна хэмээн ойлгов. Олимп, Дэлхийн олон алдар цуутан төрдөг МУБИС-ийн БТС-иас ирээдүйн Олимпын медальтан ингээд даруухан суугаа ч юм билүүдээ. Дашрамд тэрээр энэ 2024 онд АНУ-ын Austin хотноо болсон Дэлхийн аварга шалгаруулах тэмцээний ДЭД АВАРГА болохын зэрэгцээ жиндээ Монголын рекорд амжилтыг шинэчлэн тогтоогоод байгааг дуулгахад мөн таатай байна.
Ингээд 2023 оны МУБИС-ийн Шилдэг оюутан, Захирлын нэрэмжит шагналт, Дэлхийн аваргын хошой Мөнгөн медальт оюутан О.Төрболддоо сурлага, спортын улам их амжилтыг хүсч эх орон, төрөлх МУБИС-ийнхаа нэрийг ямагт өндөрт өргөн явна гэдэгт итгэлтэй байгаагаа илэрхийлье.