Монгол Улсын Боловсролын их сургууль Япон улсын Нагояа их сургуулийн төлөөлөгчдийг хүлээн авч уулзлаа.
Тус уулзалтад Нагояа их сургуулийн дэд ерөнхийлөгч, профессор М.Нагата, Хүний хөгжлийн сэтгэл зүйн дэмжлэг, судалгааны төвийн хүүхдийн сэтгэцийн эмч, доктор Номура Кенжи нар хүрэлцэн ирж, МУБИС-ийн Ректор, профессор Ж.Батбаатар, Гадаад харилцааны албаны дарга, дэд профессор Г.Цогзолмаа, Боловсрол судлалын сургуулийн захирал, профессор Д.Мөнхжаргал, тус сургуулийн Боловсролын судалгааны хүрээлэнгийн судлаач, багш, дэд профессор Д.Одгэрэл нар хүлээн авч уулзан хамтын ажиллагааны талаар санал солилцлоо.
Хоёр сургууль 2013 оноос хойш тасралтгүй 10 гаруй жил идэвхтэй хамтран ажиллаж ирсэн. Цаашид АШУҮИС-тай тусгай хэрэгцээт боловсрол болон бусад чиглэлээр хамтын ажиллагаагаа өргөжүүлэхээр төлөвлөснийг уулзалтаар онцолсон юм.
Энэ удаад МУБИС, АШУҮИС, Япон Улсын Нагояа их сургуулийн эрдэмтэн судлаачдын хамтарсан судалгааны баг “Хүүхдийн хөгжлийн эмгэг: Эрт илрүүлэлт ба дэмжлэг” сэдвийн хүрээнд судалгааны хэлэлцүүлэг зохион байгуулж, эхний үр дүнгээ танилцуулж буйгаараа ач холбогдолтой юм. Мөн цаашид байгалийн ухааны чиглэлээр хамтран ажиллах боломж, нөхцөлийн талаар санал солилцсон болно.